5-æм ноябры Малиты Геуæргийы райгуыржыл æххæст кæны 140 азы

Зындгонд поэт, прозаик, публицист Малиты Геуæргий райгуырд 5-æм ноябры 1886-æм азы хуымæтæг зæхкусæджы бинонты Чырыстон хъæуы. 1902-æм азы каст фæци Махческы дыууæкъласон дины скъола. 1904 азы райдыдта Æрыдоны семинары ахуыр, фæлæ йæ революцион хъуыдыты тыххæй ахуыргæнæндонæй æрвыст æрцыд. Дарддæры ын ахуыры фадат нал фæци. Бирæ азты куыста хæххон хъæуты скъолаты ахуыргæнæгæй æмæ директорæй. Малиты Геуæргий стыр æвæрæн бахаста ирон культурæйы райрæзтмæ. Йæ фæстæ ныууагъта адæмон сфæлдыстадимæ баст æрмæджытæ, лирикон æмдзæвгæтæ, чысыл радзырдтæ, поэмæтæ. Ахсджиаг бынат ахсынц хæххон сылгоймаджы хъысмæтыл æмдзæвгæтæ - уый ирон литературæйæн уыд ногдзинад. Йæ бирæ уацмыстæ хаст æрцыдысты скъолаты æмæ уæлдæр ахуыргæнæндæтты программæтæм. Революци æмæ мидхæсты рæстæг Малиты Геуæргий уыд ног цардыл чи тох кодта, уыдоны фарсмæ. 1917 азы слæууыд ирон революцион парти "Кермен"-ы бындурæвæрджыты 'хсæн. Йæ уацмысты дæр бынат ссардтой социалон фарстатæ. Равдыста дзы адæмы уæззау уавæр. Репресситы рæстæг поэт бавзæрста æфхæрдтытæ, 1937-æм азы йæ æвыдæй æрцахстой. Æмæ бирæ хъизæмæртты фæстæ ахæстоны амард. Малиты Геуæргийы райгуырды 140-азы юбилейы фæдыл Цæгат Ирыстоны сарæзтой номарæн мадзæлттæ. Йæ агъоммæ 29-æм октябры Ирон театры сценæйыл уыд поэты зынгонддæр уацмыстæм гæсгæ æвæрд музыкалон-аивадон равдыст. Архайдтой дзы Дигорайы паддзахадон драмон театры артисттæ, Цæгат Ирыстоны адæмон инструментты оркестр, ирон зарæггæнджытæ. Малиты Геуæргий сси ирон литературæйы зынгæ фæзынд, йе 'сфæлдыстады фæрцы фæхъæздыгдæр кодта нæ национ культурæ. Абон йæ ном хæссынц нæ республикæйы уынгтæ. Йæ æнæмæлгæ уацмыстæ та æнустæм рох нæ уыдзысты.