Дзæуджыъæуы 95-æм рæвдауæндоны хълмылгæнинæгты ныййарджытæ гранты фæрцы фæхуыздæр кодтой гæнæнтæ

Раздӕр Оля Велибекова мультфильмтӕм каст ӕрмӕст телевизорӕй, ныр та йæ йӕхӕдӕг зоны, куыд сӕ аразын хъӕуы, уый. Сывæллæтты 95-ӕм рӕвдауӕндоны иннӕ хъомылгӕнинӕгтимӕ чызг ӕрхъуыды кӕны сюжеттӕ, сныв кӕны хъайтарты ӕмӕ сын ӕххуыс кӕны экранмæ рахизынæн. Ам алы сывӕллонӕн дӕр фадат ис хи мультипликаторы ролы бафӕлварынӕн. Фыццаг уал хъæуы истори æрхъуыды кæнын. Сывӕллӕтты фантазитӕ ам парахат сты. Уыдонӕн сӕ бон у куыд ахсджиаг, бафӕзминаг нывтӕ, афтӕ фантастикон мультикӕтӕ дӕр æрæмысын. Уый фæстæ та сывӕллӕттӕ бавналынц персонажтӕ ӕмӕ декорацитыл кусынмӕ. Хъайтартӕ куы сцӕттӕ вӕййынц, уӕд райдайы иннӕ къæпхæн — кадртæм гæсгæ ист. Афтæмæй, хицӕн нывтӕ ӕмӕ фигурæтæ фестынц архайдимæ истори. Сӕрмагонд кусæнгарзыл нывгонд персонажты змӕлын кӕнынц ӕмӕ сын сӕ къам исынц кадрӕй-кадрмӕ. Къамтӕ куы баиу кӕной, уӕд та экраныл фӕзындзӕн ӕцӕг мультфильм. Сывӕллӕттӕ сæ иунӕгӕй кӕй нӕ аразынц, уый дæр ахсджиаг у. Сӕ фарсмӕ ныййарджытӕ: ӕнӕхъӕн командӕйӕ ӕрхъуыды кӕнынц сюжеттӕ, саразынц хъайтарты, ӕрдзурынц хъæппæристыл ӕмӕ сӕ рӕстӕг арвитынц иумӕйаг хъуыддагыл. Ахӕм сфӕлдыстад ӕххуыс у кӕрӕдзийы хуыздӕр базонынӕн, ахуыр сӕ кӕны хъусын, сӕйрагдӕр та — хуымӕтӕг куыст фестын кӕны бинонты истори. Ахӕм мультстуди сывӕллӕтты рӕвдауӕндоны раздæр дæр куыста. Фӕлӕ йын ныййарджыты комитет сфӕнд кодта ног фадӕттӕ раттын. Архайджытӕ рамбылдтой 2026 азы ныййарджыты хъӕппӕристы æппӕтуӕрӕсеон конкурс ӕмӕ райстой грант проект «Растим патриотов вместе» æххæст кæнынæн. Гранты фӕрӕзтӕй самал кодтой нырыккон ифтонггарз мультстудийӕн, интерактивон панель ӕмӕ национ костюмтӕ. Фӕлӕ проект æрмæст сфӕлдыстадæн арæзт нæ уыд. Йӕ сӕйраг нысан — сывӕллӕтты сӕ райгуырӕн бӕстӕйы истори ӕмӕ культурӕимӕ базонгӕ кӕнын. Уый тыххӕй-иу ныййарджытӕ ӕмӕ хъомылгӕнинӕгтӕ ацыдысты экскурситы: уыдысты Национ музейы, Хетӕгкаты Къостайы хӕдзар — музейы ӕмӕ поэты райгуырӕн хъæу — Нары. Уый фӕстӕ та скодтой мультфильмты стыр равдыст уырыссаг ӕмӕ ирон ӕвзӕгтыл. Æппӕты сӕйрагдӕр у, проект ныридӕгӕн пайда кæй хæссы, уый: сывӕллӕттӕн цымыдисаг у сӕ райгуырӕн бӕстӕйы, йӕ истори ӕмӕ традициты тыххӕй фылдӕр базонын, уыимæ ма сӕхи мультфильмты ног зонындзинӕдтӕй спайда кӕнын. Афтӕ сын Ирыстоны культурӕимӕ зонгӕ кӕнын свӕййы хуымӕтӕджы куыст нӕ, фӕлӕ зӕрдӕмӕдзæугæ сфӕлдыстадон архайд.